Фарғонадан қайтган МОҚ раҳбарияти кеча куннинг иккинчи ярмида Лос-Анжелес-2028 ёзги Олимпия ўйинларига тайёргарлик кўраётган Ўзбекистон оғир атлетика ва енгил атлетика федерацияларининг тақдимоти билан танишди. Дастлаб оғир атлетика федерациясининг бу борадаги режаларига назар ташланди.

Тақдимот билан Спорт вазирининг ўринбосари, мамлакат оғир атлетика федерацияси раисининг биринчи ўринбосари Шаҳрулло Маҳмудов таништирди. Унда Шаҳрулло Шарипович маҳаллий мусобақалар орқали иқтидорли спортчиларни саралаб олиш ва уларнинг халқаро турнирлардаги иштирокини таъминлаш, мураббийларнинг билим ва кўникмаларини ошириш лозимлиги борасида тўхталиб ўтди.

Шунингдек, терма жамоага жалб этилган мисрлик мутахассис Холид Ҳасан ҳам мавзу бўйича фикрлари билан ўртоқлашди. Мураббий ҳозирда Баҳрайн мезбонлик қилаётган жаҳон чемпионати асосий таркиб спортчиларининг имкониятларини яна бир бор синовдан ўтказиб бераётгани, шунингдек, жорий ой Қатарда ташкил этиладиган ўсмирлар ва ёшлар ўртасидаги Осиё чемпионати кучли захира таркибни кўздан кечириш имкониятини тақдим этишини таъкидлади.

Шундан сўнг Ўзбекистон енгил атлетика федерациясининг тақдимоти муҳокама қилинди. Қайд этиш жоиз, Олимпия ўйинларида энг кўп йўлланма ва медаллар жамланмаси айнан ушбу спорт турида ўйналади. Бироқ терма жамоамиз сўнгги пайтларда саноқли лицензиялар билан чекланиб қолмоқда.

Суҳбатда мазкур жиҳат танқид остига олиниб, Лос-Анжелес-2028 ёзги Олимпия ўйинларида енгил атлетикачиларимиз делегациямизга энг кўп йўлланма тақдим этадиган жамоа бўлишлари лозимлиги таъкидланди. Тақдимот давомида терма жамоа бош мураббийи Гўзал Хуббиева кўплаб дастурларда иқтидорли ёшлар етишиб чиқаётгани, сўнгги йилларда ўтказилган халқаро мусобақалар иқтидорли ёшларни саралаб олишга имкон бераётганини билдирди.

Якунда ҳар икки федерация вакилларининг Ўзбекистон делегациясини бўлажак Олимпия ўйинларига пухта тайёрлаш бўйича тайёрланаётган Президент қарори лойиҳаси учун таклифлари белгилаб олинди.

Бугун МОҚ раҳбарияти Қорақалпоғистан Республикасига жўнаб кетди ва кун давомида ушбу ҳудуддаги спорт инфратузилмаси билан танишади.