Спорт федерация ва ассоциацияларнинг янги Олимпия даври учун тайёргарлик режалари билан танишиш ишлари давом этади. Бугун МОҚ раҳбарияти дастлаб Ўзбекистон триатлон федерациясига ташриф буюриб, ушбу спорт турининг тақдимотини кўздан кечирди.

Қайд этиш жоиз, ўзбекистонлик атлетлар шу пайтгача ушбу спорт турида Олимпия ўйинларида иштирок этишмаган. Федерация бош котиби Елена Кун триатлончиларимиз Лос-Анжелес-2028 ёзги Олимпия ўйинларида узоқ кутилган йўлланмани тақдим этишни мақсад қилишгани ҳақида тўхталиб ўтди. Бу борада спортчиларимизнинг имкониятлари етарли баҳоланиб, муҳокамада уларнинг жаҳон рейтингидаги ўринларини кўтариш учун амалга ошириладиган ишларга кўпроқ аҳамият қаратилди.

Алоҳида таъкидлаш ўринлики, Осиё Олимпия кенгаши вице-президенти, МОҚ раисининг биринчи ўринбосари Отабек Умаров мамлакат триатлон федерациясидаги бошқаруви даврида ушбу спорт ривожини бутунлай янги босқичга олиб чиққан эди. Суҳбатда Ўзбекистон триатлон федерацияси вакиллари Отабек Муҳаммадалиевичнинг ушбу хизматларини алоҳида эътироф этиб ўтишди.

Йиғилишда триатлон спортининг юртимиздаги оммавийлигини янада ошириш йўлидаги режалар ҳам кўриб чиқилди. Хусусан, Самарқандда мунтазам Челленжер таснифидаги халқаро турнирларни ўтказиш, бу орқали меҳмонларни бой тарихимиз билан таништириш муҳимлиги таъкидланди.