Yunon-rum kurashi boʻyicha Oʻzbekiston terma jamoasi soʻnggi jahon chempionatiga qadar 2001-yil dunyo birinchiligida oltin medalni qoʻlga kiritgan. Unda Zagrebdagi chempionligi bilan barchaning olqishiga sazovor boʻlgan 19 yoshli hamyurtimiz Aytjan Xalmaxanov hali dunyoga kelmagan edi.

– 24 yil kutilgan chempionlik Sizga nasib qildi. Musobaqadan keyingi hissiyotlar qanday?
– Mana shunday ahamiyatli oltin medalni qoʻlga kiritganimdan juda xursandman. Buni tasvirlash qiyin. Biz bu musobaqaga 1-yil qattiq tayyorlandik. Mehnatimiz samarasini koʻrish nasib qildi. Afsuski, jamoamizdagi qolgan akalarimga ozgina omad yetishmadi. Bu bilan toʻxtab qolmaymiz. Keyingi safar ular ham chempion boʻlib qaytishlariga ishonaman.

– Rustam Assakalov terma jamoada nimalarni oʻzgartirdi? Uning ishlash uslubi qanday?
– Murabbiyimiz mehnatkash, juda ham aqlli inson. Barchamizni oʻz farzandidek koʻradi. Doim qoʻllab-quvvatlab, motivatsiya berib keladi. Rustam aka 2024-yil oktyabr oyida murabbiylikka kelgan boʻlsa, ortda qolgan 1-yil katta natijalar koʻrsata oldik. Osiyo chempionatida umumjamoa hisobida ikkinchi, jahon chempionatida esa uchinchi boʻldik. Bunday natija hamma murabbiyning ham qoʻlidan kelmasdi.

– Afsuski, siz kurashadigan -63 kg Olimpiya vazn toifasi emas. Los-Anjeles-2028 Olimpiadasiga qaysi vaznda tayyorlanasiz?
– Ha, -63 kg Olimpiya vazni emas. Boʻlajak Olimpiadaga -67 kg vazn toifasida tayyorgarlik koʻraman. Tabiiy vaznim kattaroq boʻlgani uchun -60 kgga vazn qaytara olmayman. Nasib boʻlsa, murabbiylarim bilan Los-Anjelesdan ham oltin medal bilan qaytamiz.

– Baʼzi kurashchilarning omadi kelib, yoshligidagi kumiri bilan musobaqada toʻqnash kelib qoladi. Siz kumiringiz bilan hech toʻqnash kelganmisiz?
– Men havas qiladigan 2 kurashchi Qirgʻizistondan: Joloman Sharshenbekov va Akjol Mahmudov. Asosiy usulimni Sharshenbekovga havas qilib ishlaganman. U bilan tez orada toʻqnash kelib qolsak kerak. Bu kunni sabrsizlik bilan kutyapman. Mahmudovning kurashidan esa motivatsiya olaman. Zagrebda finaldan oldin Akjol chempion boʻlishimga ishonishini aytdi. Bu qoʻllov menga kuch berdi.