Xanchjou-2022 Osiyo oʻyinlaridan soʻng taekvondo WT boʻyicha Oʻzbekiston terma jamoasi yana oʻquv-mashgʻulot yigʻinlariga qaytdi. Pavel Xan boshchiligidagi terma jamoamiz assotsiatsiya bazasida mashgʻulotlarni olib bormoqda.

Mazkur yigʻin dekabr oyida Angliyada boʻlib oʻtadigan yakuniy Gran-pri, qolaversa, Xitoy mezbonlik qiluvchi litsenzion “Katta dubulgʻa” turnirlariga tayyorgarlik vazifasini oʻtab beradi. Rejaga koʻra, undan avval hamyurtlarimiz 9-10-noyabr kunlari WT Prezidenti kubogi uchun Iordaniyada oʻtadigan G2 tasnifidagi turnirda ishtirok etishadi. Mashgʻulotlarda terma jamoaning asosiy va zaxira tarkib sportchilari qatnashmoqda.